- 190 -

1353. Jan. 13. Breslau.

Privilegium Herzog Wenzels für die liegnitzer Gewandschneider.

In gotis namen amen. Wir Wenczlaw von gotis gnaden herczoge in Slesien der erste vnd herre czu Legnicz, bekennen offinbar an dysen briue, daz wir von vnsen sundirlichen gnaden geben vnsen koufluten czu Legnicz vnd den, dy do pflegen gewant czu snyden czu vromen und czu nuczberkeyt dyse nochgeschrebene saczungen, alz man dy czu Breczlaw hat vnd heldet vndir dem koufhuse; daz ersten, daz keyn man sal noch entar gewant snyden in dem wichbilde czu Legnicz vf dem lande in dorfirn noch in steten andirs mvgen wenne undir dem koufhuse, tete abir ymant do wedir, der do gewant snete, der sal geben io von dem snete eynes langen tuches von Lofil adir von Gint dri mark, alz manchen snether tuet in daz tuch alze manch stunt, sal her geben dri mark; vnde von eyme snete eynes Ypryschen tuches sal her io von dem snete eyne halbe mark geben, vnd von eyme gemengeten deme gliche, io von idem snete ouch eyne halbe mark geben vnd von eyme tuche, daz hy in den landen gemacht ist, io von eyme snete eynen virdung geben; vnd dri sullen eyn tuch koufen vnd nicht me, vnd sullen daz teylen vndir den kameren in dri stukke, daz eyn stukke io alze lank sal syn alze daz andir, vnd wo man vyndet eynen schroter, der eyn tuch teylte vzwendik den kameren me, wenne an dri stukke, der sal sin bestanden eyner halben marke, vnd ouch keyn cramer sal gewant snyden tabilzayt noch harraz noch keynerley wollin gewant, wo eyner wurde begriffen do mitte, der do snete, deme mak man dy buse machen gros adir kleyne vnd der selbe muste sich czu gnaden geben; vnd alle dy busen, dy do von geuallen, der geboren vns czwene pfennynge vnd der dritte pfenning geboret den koufluten; vnd wo dyse vorgeschrebene saczunge wurde gebrochen, vmme den broch so sal gen vnse camerer adir eyn andir vnsir dyner, eyne vnd czwene vz den koufluten, dy dor czu gehoren vnd sullen daz wandil nemen, alze hy vor geschreben ist. Vnd der rede czu eyme geczugnisse so haben wir dysen brif geheysen geben vnd vorsigiln mit vnsem ingesigil. Vnd ist gegeben czu Breczlaw an dem nesten svntage noch dem obirsten tage noch gotis geburt tusunt vnd drihundirt iar in dem drivndfumfczegisten iare. Des sint geczuge her Heynich von Landiskron, her Gawin Abscacz, her Henczil von Meyehwalde, Pecze Schirmer, Fricze von Landiskron, Stephan Trache vnd Sydil von Brokotindorf vnse hofeschriber.

O. d. St. L. No. 82. Das schlecht erhaltene Wappensiegel von rothem Wachs an rothen und violetten Seidenschnüren.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866